Чаму Пуцін загадаў пасадзіць старога сябра

• Вадзім Дзянісенка
• 18.06.2026, 15:46

Параноя прагрэсуе.

У Пецярбургу гучна затрымалі Ілью Трабера — аднаго з самых уплывовых экс-бандытаў, а цяпер саўладальніка ўсіх магчымых бізнесаў: ад мясцовага порта да перавалкі нафты

Ілья Трабер (1950 г.н.) быў недатыкальнай фігурай. Ён выйшаў з тамбоўскай групоўкі, але даволі рана зразумеў, што бізнес — лепшае прыкрыццё для бандытызму, чым наадварот, і ўжо ў канцы 90-х стаў вельмі закрытым бізнесменам.

Варта адразу адзначыць: у свой час Пяскоў прызнаў знаёмства Пуціна з Траберам, і той — ледзь не адзіны выхадзец з крымінальнага свету, знаёмства з якім афіцыйна пацверджана Крамлём (Прыгожын тут не ў лік, у крымінальным плане ён быў нікем у параўнанні з Траберам). Яшчэ адна невялікая дэталь: кіраўнікі «Газпрама» і «Газпрамнафты» Мілер і Дзюкоў часткова могуць лічыцца «выхаванцамі» Трабера.

Як бы там ні было, але Трабер ніколі не лез у палітыку і публічнае жыццё. Ён, падаецца, выдатна разумеў сваё месца ў палітычнай іерархіі пуцінскай Расіі і трымаўся пэўных правілаў гульні. І вось яго затрымліваюць прадстаўнікі цэнтральнага (маскоўскага) офіса ФСБ за забойства дэпутата Выбаргскага гарсавета, з якім, відаць, Трабер не падзяліў пэўныя бізнес-інтарэсы. Падкрэслю — Масква, падаецца, не давярала пецярбургскім чэкістам і вяла справу без іх. Дык што ўсё гэта азначае?

1. Затрыманне такога ўзроўню не магло не быць санкцыянавана самім Пуціным. Забіты дэпутат не ўваходзіў у кола нейкіх уплывовых, з пункту гледжання Пуціна, людзей, і таму мы можам вылучыць дзве версіі таго, што ж адбылося.

Першая версія — палітычная. Трабер мог у вузкім коле дазволіць сабе нейкую крытыку рэжыму, і нехта з кіраўнікоў ФСБ прадэманстраваў Пуціну, што раскрыў «змову».

Другая версія — чыста эканамічная. Нехта з кіраўнікоў ФСБ здолеў данесці да Пуціна, што Трабера трэба прыбраць, а яго актывы праз нацыяналізацыю перадаць у патрэбныя рукі.

Нельга выключаць, што гэтыя дзве версіі альбо ўжо аб'яднаныя ў адно цэлае, альбо будуць аб'яднаныя ў найбліжэйшы час.

2. Хто ў ФСБ мог такое здзейсніць? Версій цэлых дзве. Ці першы намеснік кіраўніка — Каралёў, ці кіраўнік вайсковай контрвыведкі, чалавек Сечына, Ткачоў. Справа ў тым, што ў ФСБ цяпер існуе трайная ўлада, калі адразу трое людзей маюць свае вертыкалі (акрамя двух вышэйназваных ёсць яшчэ кіраўнік ФСБ Бортнікаў).

Уласна, чаму важна, хто стаў аўтарам затрымання Трабера? Адказ на гэтае пытанне будзе азначаць, што менавіта гэты чалавек з'яўляецца адным з галоўных прэтэндэнтаў на месца Бортнікава, які, падаецца, сур'ёзна збіраецца на пенсію. Таксама гэта сведчыць пра рэальны ўплыў гэтага чалавека на працэсы ўнутры структуры, з аднаго боку, і непасрэдна на Пуціна — з другога.

3. Што нам з гэтага?

Калі палітычная версія апынецца праўдзівай, гэта будзе азначаць, што параноя Пуціна насамрэч узмацняецца, а арышт Трабера — сігнал усім элітам: нават у лазнях мы вас падслухоўваем і ведаем пра вашыя задумы ўсё. Урэшце, нават калі палітычнай версіі і няма, большая частка эліт будзе верыць у яе існаванне.

Калі ж гэта чыста эканамічная гісторыя — гэта стане глабальным перапалохам для ўсіх. Калі забіраюць усё ў Трабера, то могуць забраць і ў каго заўгодна.

Прасцей кажучы, гэтая справа напалохае расійскія эліты і яшчэ больш пераканае іх у тым, што іх галоўная праблема — Пуцін. Гэта не азначае рэвалюцыю. Гэта азначае, што пры найменшай магчымасці эліта пяройдзе на бок тых, у каго ёсць шанец змяніць Пуціна.

Вадзім Дзянісенка, «Фэйсбук»