«Белпошта» пераблытала дзве вядомыя славутасці

• 18.06.2026, 16:27

Гродзенская пажарная каланча стала «ратушай» у Магілёве.

«Белпошта» выпусціла каробку для пасылак з магілёўскай ратушай, але пераблытала яе з іншым будынкам. На выяве апынулася славутасць іншага горада.

Фотаздымкам з каробкай для пасылак падзялілася карыстальніца Трэдс.

«Цікава, чаму ў «Белпошце» вырашылі, што наша, гродзенская пажарка — гэта ратуша ў Магілёве?» — задалася пытаннем жанчына.

На каробцы напісана «Магілёў. Ратуша». Таму нібыта на малюнку знаходзіцца магілёўская ратуша. Аднак замест яе надрукавана выява пажарнай каланчы з цэнтра Гродна.

У магілёўскай ратушы ёсць выразны шпіль, ды і прыбудова вакол яе адрозніваецца — у трохпавярховага дома побач іншыя формы вокнаў, няма і сцяны з панно, як у Гродне.