Z-прапагандыст расказаў, што Украіна можа наступным разам разбамбіць у Маскве

• 18.06.2026, 17:57

Удар па НПЗ — толькі пачатак.

Z-ваенкар Ігар Дзмітрыеў піша, што ўдары Украіны па Маскоўскім НПЗ у Капотні — толькі пачатак больш сур'ёзнай і маштабнай кампаніі супраць расійскай прамысловасці ў сталіцы РФ, піша «Дыялог».

Паводле яго слоў, калі ўкраінскія дроны ўжо спакойна прарываюць ППА Масквы, то пад пагрозай аказваюцца не толькі нафтавыя аб'екты, але і абаронныя.

Дзмітрыеў адзначае, што Масква і вобласць — найбуйнейшы прамысловы рэгіён Расіі. Там сканцэнтраваныя прадпрыемствы энергетыкі, ракетабудавання, абароннай прамысловасці, радыёэлектронікі і аптыкі ваеннага прызначэння. Ён наўпрост піша, што пытанне цяпер не ў тым, ці працягнуцца атакі, а ў тым, што будзе наступным.

«На поўдні вобласці, адкуль прылятаюць дроны ў Капотню: нафтабазы ўздоўж шашы, газаперапрацоўчае прадпрыемства і найбуйнейшая ЦЭЦ краіны. У тым жа амаль раёне, літаральна сярод жылых кварталаў, — галоўнае прадпрыемства па вытворчасці цвёрдага ракетнага паліва для балістычных і зенітных ракетных комплексаў. Вытворчасць, відаць, нікуды не вынеслі. Выбух там — сур'ёзная справа. На поўдні ж — вытворчасць супрацьтанкавых і зенітных ракет, адзіны ў краіне вытворца скафандраў і катапультных крэслаў для баявой авіяцыі», — піша ён.

Асобна Z-ваенкар прызнае, што атака на НПЗ у Капотні мае моцны бачны эфект, але вакол Масквы ёсць нашмат больш адчувальныя для Расіі аб'екты. У маі, паводле яго слоў, дроны ўжо прыляталі ў Каралёў, Хімкі, Лобню і Зяленаград, а таксама атакоўвалі нафтаналіўную станцыю ў Солнечнагорску.

Дзмітрыеў піша, што разведвальныя магчымасці Украіны сталі значна сур'ёзнейшымі, чым раней, і Масква не павінна лічыць гэтыя ўдары выпадковымі.

Расійскія ваенныя прапагандысты ўжо не спрачаюцца, ці можа Украіна дацягнуцца да Масквы, а абмяркоўваюць, якія наступствы гэта будзе мець для абароннай прамысловасці РФ.