У Францыі ўвялі абавязковае тэставанне членаў урада на наркотыкі

• 18.06.2026, 18:10

Тэставанне будзе ажыццяўляцца без папярэджання.

Прэм’ер-міністр Францыі Себасцьен Лекорню абавязаў супрацоўнікаў усіх міністэрстваў, уключна з міністрамі, праходзіць абавязковыя праверкі на ўжыванне наркотыкаў, паведамляе franceinfo.

Адпаведны ўнутраны цыркуляр прадугледжвае правядзенне праверак у форме экспрэс-тэстаў сліны непасрэдна ў сценах міністэрстваў. Тэставанне будзе ажыццяўляцца без папярэджання.

Мера накіраваная на забеспячэнне «бездакорнасці» высокапастаўленых чыноўнікаў. Яна закране і іншых прызначаемых чыноўнікаў, уключаючы паслоў і прэфектаў.

У выпадку станоўчага выніку тэсту або адмовы ад яго праходжання да чыноўнікаў будуць прымяняцца меры дысцыплінарнага спагнання. Пры гэтым тых, у каго будзе выяўлена ўжыванне наркотыкаў, могуць накіраваць «у структуры аховы здароўя».

Згодна з цыркулярам, міністры абавязаныя да 26 чэрвеня прадставіць план дзеянняў па ўкараненні сістэмы рэгулярных праверак.