Хегсет падтрымаў ідэю стварыць у Польшчы амерыканскую вайсковую базу

• 18.06.2026, 18:52

Зараз у Польшчы размешчана каля 10 тысяч амерыканскіх вайскоўцаў.

Кіраўнік Пентагона Піт Хегсет падтрымаў прапанову Міністэрства абароны Польшчы аб стварэнні пастаяннай вайсковай базы ЗША на тэрыторыі краіны. Пра гэта паведаміў польскі міністр абароны Уладзіслаў Касіняк-Камыш.

Ліст з прапановай спадар Касіняк-Камыш накіраваў кіраўніку Пентагона 29 мая. На сустрэчы кіраўнікоў абаронных ведамстваў краін НАТА спадар Хегсет сказаў, што ён і яго каманда падтрымліваюць такую ідэю. «Пастаянная прысутнасць амерыканскіх войскаў — гэта мэта, да якой імкнуліся і папярэднія ўрады», — заявіў кіраўнік Мінабароны Польшчы.

Паводле слоў польскага міністра, краіна таксама падтрымлівае стратэгію і канцэпцыю «НАТА 3.0», пра якую напярэдадні казаў Піт Хегсет. Кіраўнік Пентагона заяўляў, што ваеннаму блоку неабходна вярнуцца да жорсткай пазіцыі для «стрымлівання пагрозы на кантыненце», а не займацца «пытаннямі гендарнай роўнасці» і «жорсткай эканоміяй на абароне».

Зараз у Польшчы размешчана каля 10 тыс. амерыканскіх вайскоўцаў. У сярэдзіне мая ЗША адмянілі накіраванне ў Польшчу больш за 4 тыс. вайскоўцаў з-за магчымай перакідкі падраздзяленняў з Германіі. Пазней Дональд Трамп заяўляў, што Злучаныя Штаты ўсё ж накіруюць 5 тыс. вайскоўцаў.