Wildberries у Беларусі запанікаваў

• 30.07.2026, 12:15

Тэст мінскага склада непрыстойна зацягнуўся.

Прайшла сярэдзіна 2026 года, на якую быў запланаваны афіцыйны запуск лагістычнага склада Wildberries пад Мінскам. На маўчанне ёсць рэзон: пасля ліквідацыі аб’екта ў Электрасталі цяпер гэта другі па магутнасцях комплекс маркетплэйса, піша «Беларусы і рынак».

Яго працу ўжо пратэсціравала ў маі гэтага года сама Тацяна Бакальчук і дала адмашку на запуск. Як тады пісалі СМІ, ён знаходзіўся на «фінальнай стадыі рэалізацыі і ўжо пачаў працу ў тэставым рэжыме».

Афіцыйных паведамленняў пра адкрыццё склада на тэрыторыі парку «Вялікі Камень» не было. Аднак, улічваючы сітуацыю вакол лагістычнай інфраструктуры маркетплэйса ў Расіі, дзе ўдарамі ўкраінскіх дронаў выведзена з ладу больш за 15% магутнасцяў Wildberries, разумна ўвогуле не прыцягваць увагі да гэтага аб’екта.

Бо менавіта на яго прыпадае значная частка функцыяналу, які страціла Wildberries у Расіі. Тацяна Бакальчук інвеставала ў свой найбуйнейшы беларускі комплекс 11 млрд расійскіх рублёў і на 27 га атрымала аб’ект плошчай 140 тыс. кв. м.

Да пачатку атак ЗСУ на інфраструктуру Wildberries беларускі хаб саступаў па магутнасцях толькі комплексам у Каледзіне (больш за 200 тыс. кв. м) і Электрасталі (155 тыс. кв. м). Пасля знішчэння склада ў Электрасталі ён стаў другім. Але, улічваючы праведзеную ЗСУ атаку на комплекс у Каледзіне (яна была няўдалай), пасля наступнай спробы беларускі аб’ект цалкам можа стаць і галоўным лагістычным складам Wildberries.

Склад у Беларусі адносіцца да класа «A+» і можа адгружаць да 1,5 млн адзінак тавараў за суткі. Адначасовая змяшчальнасць склада складае больш за 50 млн вырабаў.