У эканомікі Пуціна заглух ваенны рухавік
- 30.07.2026, 12:38
Урад паведаміў пра чатырохразовае запаволенне ВУП Расіі.
Расійская эканоміка завяршыла першае паўгоддзе 2026 года ростам на 0,3%, паведаміла Міністэрства эканамічнага развіцця (МЭР), як адзначае сайт The Moscow Times.
У параўнанні з тым жа перыядам мінулага года (1,2%) тэмпы эканамічнага росту запаволіліся ў чатыры разы, у параўнанні з другой паловай мінулага года (0,9%) — у тры разы. У чэрвені, паводле ацэнак МЭР, эканоміка паскорылася да росту на 1,1%. Аднак гэтага аказалася недастаткова, каб кампенсаваць спад у першым квартале (-0,2%) і стагнацыю ў красавіку–маі.
Пасля ваеннага буму 2023–24 гадоў, калі ўрад выдзеліў рэкордныя з савецкіх часоў грошы на армію, а грашовая маса ў краіне павялічылася на 50 трыльёнаў рублёў, расійская эканоміка «застопарылася», канстатуе Эліна Рыбакова, старшы навуковы супрацоўнік Інстытута міжнароднай эканомікі Пітэрсана.
Чынавікі «зажымаюць усе астатнія сектары эканомікі, каб хаця б нейкі рост працягваўся ў ваенцы», але і ваенны сектар пачаў запавольвацца, адзначае яна. Паводле даных МЭР, выпуск «гатовых металічных вырабаў», да якіх статыстыка адносіць бомбы і снарады, у першым паўгоддзі павялічыўся на 8,8% (супраць 18% летась); вытворчасць «камп'ютараў, электронікі і оптыкі» — на 4,3% (супраць 11,7%).
Тым часам грамадзянскія галіны эканомікі ўсё глыбей пагружаюцца ў рэцэсію: за паўгоддзе выпуск адзення скараціўся на 6,3%, металургічныя прадпрыемствы страцілі 9,1% вытворчасці. Пасля удараў па НПЗ рэкордна за 20 гадоў даступных даных абваліўся выпуск нафтапрадуктаў — на 21,7% у чэрвені і на 7,7% за паўгоддзе.
Серыя налётаў на склады Wildberries, найбуйнейшага ў краіне маркетплэйса, які штогод прадае тавараў на 3% ВУП, таксама нясе для эканомікі наступствы, што выходзяць далёка за межы страты згарэлых тавараў, папярэджвае Аляксандр Каляндр, дырэктар Eurasia Group: тысячы прадаўцоў могуць збанкрутаваць, гэта пацягне за сабой нявыплату крэдытаў і падаткаў, што, у сваю чаргу, ударыць па бюджэце і банкаўскай сістэме.
Мінулым годам расійская эканоміка вырасла на 1% — у 2,5 раза менш за першапачатковы прагноз урада. На бягучы год МЭР заклала ў прагнозы рост ВУП на 1,2%, але ўжо вясной знізіла ацэнку да 0,4%. Пры гэтым Сбербанк і ЦБ не выключаюць, што росту не будзе ўвогуле: іх ацэнкі складаюць 0–0,5%.
«У лепшым выпадку» эканоміка завершыць год нулявым ростам, лічыць Рыбакова з Інстытута міжнароднай эканомікі Пітэрсана: улады «па сусеках» спрабуюць знайсці рэсурсы, каб працягваць вайну, павышаючы падаткі і заліваючы грошы ў банкаўскую сістэму, каб тая працягвала крэдытаванне. «Але і па сусеках атрымліваецца ўсё менш і менш», — адзначае Рыбакова.