У Венгрыі з-за спякоты прыпыняе працу адзіная АЭС

• 31.07.2026, 1:34

Насельніцтва і прадпрыемствы папярэдзілі пра магчымы энергакрызіс.

Прэм'ер-міністр Венгрыі Петер Мадзяр папярэдзіў, што на наступным тыдні краіна можа сутыкнуцца з энергетычным крызісам пасля таго, як аператар адзінай у краіне атамнай электрастанцыі «Пакш» абвясціў пра прыпыненне яе працы.

Як піша «Еўрапейская праўда», крытычная сітуацыя ўзнікла праз засушлівае надвор'е. АЭС «Пакш» вымушаная прыпыніць працу з-за нізкага ўзроўню вады ў Дунаі, акрамя таго, сярод насельніцтва расце спажыванне электраэнергіі.

Урад Венгрыі звярнуўся да буйных спажыўцоў, уключаючы вытворцаў акумулятараў і аўтамабіляў, з просьбай добраахвотна скараціць спажыванне электраэнергіі з 17:00 да 22:00 падчас спякоты.

Петер Мадзяр таксама папрасіў венграў «стрымана і адказна» ставіцца да выкарыстання электраэнергіі, паабяцаўшы, што і ў дзяржаўных будынках будзе абмежавана яе спажыванне.

«Мы працуем над тым, каб пазбегнуць больш жорсткіх абмежаванняў і забяспечыць бяспечнае функцыянаванне Венгрыі ў найбліжэйшыя дні», — заявіў Мадзяр.

Разам з тым ён адзначыў, што калі прынятых захадаў будзе недастаткова, урад можа звярнуцца да так званага ротацыйнага адключэння электраэнергіі.

30 ліпеня венгерская энергетычная кампанія MVM паведаміла, што ўсе блокі атамнай электрастанцыі «Пакш» — адзінай у Венгрыі — спыняць сваю працу на працягу 24–72 гадзін з-за рэкордна нізкага ўзроўню вады ў Дунаі. Такое рашэнне было прынята ўпершыню за ўвесь час існавання гэтай АЭС. Раней з-за тэхнічнай няспраўнасці прыпыніла працу венгерская цеплавая электрастанцыя «Дунаменці».