Зяленскі назваў страты Украіны і Расіі ў вайне

• 31.07.2026, 11:50

Баланс складае прыблізна 1:14 на карысць ЗСУ.

Страты расійскай арміі ў вайне значна большыя, чым страты Сіл абароны Украіны. Нягледзячы на гэта, дакладныя лічбы пакуль невядомыя.

Пра гэта заявіў украінскі лідар Уладзімір Зяленскі, паведамляе Fox News.

Амерыканскі журналіст пацікавіўся ў кіраўніка дзяржавы, ці ведае ён прыблізныя страты расійскіх акупацыйных войскаў за чатыры гады поўнамаштабнай вайны.

«Так. Адпаведна, іх страты — 1 мільён 600 тысяч усяго, з іх каля 700 тысяч — загінулі. Прыблізна», — адказаў Зяленскі.

Пасля гэтага журналіст спытаўся, ці можа прэзідэнт Украіны назваць страты Сіл абароны.

Паводле слоў Зяленскага, гэта зрабіць вельмі складана.

«Прабачце, шчыра кажучы, я не хачу быць занадта адкрытым у гэтым пытанні, бо расіяне зразумеюць, што адбываецца з нашай арміяй. У нас каля 50 тысяч загінулых вайскоўцаў, а таксама каля 400 тысяч параненых», — заявіў украінскі лідар.

Фактычна Зяленскі пацвердзіў, што страты Расіі загінулымі прыкладна ў 14 разоў вышэйшыя, чым у Украіны.

Ён таксама дадаў, што ёсць вельмі вялікая колькасць зніклых без вестак.