Зяленскі: На камандзіра «Хартыі» здзейснены замах

• 31.07.2026, 15:13

Нападнік і яго саўдзельнік затрыманыя.

Прэзідэнт Украіны Уладзімір Зяленскі паведаміў, што ў пятніцу, 31 ліпеня, быў здзейснены замах на камандзіра корпуса «Хартыя» Ігара Абаленскага. Нападнік і яго саўдзельнік затрыманыя.

«Размаўляў з камандзірам «Хартыі» Ігарам Абаленскім. Сёння быў здзейснены замах на Ігара. Нападнік і яго саўдзельнік затрыманыя. Праводзяцца неабходныя працэсуальныя дзеянні», — заявіў прэзідэнт у сацсетках.

Выконваючы абавязкі кіраўніка СБУ Аляксандр Паклад далажыў Зяленскаму пра замах.

«На гэтую спробу ўдару па Украіне і па ўкраінскім камандзіры мы абавязкова адкажам. Падзякаваў Ігару за службу і пажадаў біць па акупантах яшчэ мацней», — напісаў кіраўнік дзяржавы.

Абаленскі — кадравы вайсковец, які ўдзельнічаў у баявых дзеяннях на Данбасе яшчэ з 2014 года. У 2015 годзе ён узяў удзел у стварэнні брыгады хуткага рэагавання «Рубеж», дзе ўзначаліў першы батальён. Пазней ён працаваў у аграрным бізнэсе — спачатку ў холдынгу «МХП», а затым у кампаніі «Агротрэйд». У першыя дні поўнамаштабнага ўварвання Абаленскі служыў у «Сілах спецыяльных аперацый», а пазней прыняў прапанову аграбізнесмена Усевалада Кажамякі і далучыўся да добраахвотнага фармавання «Хартыя», створанага ў Харкаве. На пачатку 2023 года «Хартыя» была пераўтворана ў 13-ю брыгаду НГУ; Абаленскі стаў яе камандзірам і мадэрнізаваў сістэму кіравання падраздзяленнем у адпаведнасці са стандартамі НАТА. У 2025 годзе Генеральны штаб прыняў рашэнне стварыць корпус на базе брыгады «Хартыя».