Названая галоўная рыса характару даўгажыхароў

• 9.07.2026, 8:32

Сакрэт ад жыхароў Сардзініі.

Людзі, што жывуць у «блакітнай зоне» Сардзініі — рэгіёне з анамальна высокай доляй стагодоўцаў, — не адрозніваюцца ад суседзяў паводле фізічнага здароўя і ладу жыцця, затое істотна пераўзыходзяць іх па адной рысе асобы: адкрытасці да новага вопыту. Менавіта яна, судзячы па ўсім, дапамагае ім заставацца актыўнымі да глыбокай старасці, — паказала італьянскае даследаванне. Праца апублікаваная ў часопісе International Journal of Applied Positive Psychology (IJAPP).

Псіхолаг Марыя К’яра Фастамэ з Універсітэта Кальяры і яе калегі абследавалі 125 жыхароў вострава ва ўзросце ад 71 да 101 года: 55 з іх жылі ў «блакітнай зоне», 70 — у суседніх абшчынах з падобным сацыяльна-эканамічным фонам і аднолькавым доступам да бясплатнай медыцыны.

Удзельнікі прайшлі тэсты на псіхалагічны дабрабыт, якасць жыцця, звязаную са здароўем, і пяць асноўных рыс асобы паводле мадэлі Вялікай пяцёркі: адкрытасць, добрасумленнасць, экстраверсію, дабразычлівасць і нейратызм. Таксама ацэньваліся навыкі спраўляння са стрэсам і час, прысвечаны хобі.

Жыхары «блакітнай зоны» не прадэманстравалі значна вышэйшай якасці жыцця, звязанай са здароўем. Затое ў іх аказаўся статыстычна вышэйшы ўзровень адкрытасці — цікаўнасці да свету, гатоўнасці да інтэлектуальнага пошуку і новых уражанняў, — а таксама лепшыя навыкі спраўляння і больш часу на стымулюючы дасуг.

Паводле аўтараў, адкрытасць уплывае на даўгалецце ўскосна: чалавек з высокім узроўнем гэтай рысы ахвотней заводзіць новыя знаёмствы, бярэцца за захапленні, працягвае вучыцца і застаецца фізічна актыўным — тым самым умацоўваючы якраз тыя звычкі, што запавольваюць старэнне.

Іншая важная рыса — добрасумленнасць — была звязаная з задаволенасцю жыццём і добрымі навыкамі спраўляння. Нейратызм (схільнасць да негатыўных эмоцый), наадварот, карэляваў з ніжэйшай якасцю жыцця незалежна ад месца пражывання.