ШІ-актрыса згуляе галоўную ролю ў паўнаметражным фільме

• 9.07.2026, 11:27

Над стужкай працуюць рэальныя рэжысёры і сцэнарысты.

А што, калі нашчадкі будуць развешваць па сценах плакаты з зоркамі ШІ? Магчыма, да тых часоў яшчэ далёка, аднак ШІ-актрыса Тылі Норвуд ужо рыхтуецца да «здымак» у першым паўнаметражным фільме, піша «Нож».

Тылі Норвуд — першая ў свеце артыстка, ад пачатку да канца згенераваная з дапамогай штучнага інтэлекту. Мінулым годам яе прэзентавалі гасцям кінафестывалю ў Цюрыху, што выклікала неадназначную рэакцыю ў коле кінематаграфістаў.

У ліпені гэтага года кампанія Particle 6 абвясціла, што Тылі зацверджаная на сваю першую галоўную ролю ў паўнаметражным фільме Misaligned («Зрушаная»). Норвуд будзе іграць саму сябе — маладую істоту ШІ, якая паступова набывае пачуцці.

Над стужкай працуюць рэальныя рэжысёры і сцэнарысты. Месцам дзеяння стане «сусвет Тылі» — пэўны «сюррэалістычны лічбавы свет», размешчаны ў воблаках.

«ШІ можа дапамагчы ў стварэнні фільмаў высокай якасці, але толькі пры ўмове значнага ўдзелу чалавека ў працэсе, яго майстэрства і разважлівасці», — разважае Элін ван дер Вельдэн, гендырэктарка і заснавальніца Particle 6.

Паводле слоў Элін ван дер Вельдэн, фільм падштурхне людзей да размовы пра страхі адносна развіцця ШІ. Пры гэтым стужка не будзе павучальнай — у сцэнары шмат смешных і абсурдных сцэн.