Уладзімір Някляеў з нагоды свайго юбілею напісаў жартоўны верш

• 9.07.2026, 19:27

Вядомаму беларускаму паэту споўнілася 80 гадоў.

Вядомы беларускі паэт, празаік і грамадскі дзеяч Уладзімір Някляеў святкуе свой 80‑гадовы юбілей. У першую ж раніцу 81‑га года жыцця ён напісаў новы верш — «Некралог».

НЕКРАЛОГ

Пад гадамі, якія адмераў мне Бог,

Ціха-паціху падводзіцца рыса.

Хутка з’явіцца мой некралог –

Нікім не падпісаны.

Вось калі б я памёр да часоў Пазьняка,

Да Аляксандра Рыгоравіча прыхода,

Некралог падпісаў бы сакратар ЦК

І найлепшыя прадстаўнікі народа.

Падпісалі б пісьменнікі. Не маленькія нейкія –

Толькі тыя, хто ў званні... І вечным пяром

Падпісаў бы Сам

старшыня Саюза пісьменнікаў,

Калі б я сам не быў старшынём.

Тут праблема ўзнікала: магла быць няўвязка

З паведамленнем агенцыі ТАСС...

Але пазванілі з ЦК: “Калі ласка,

Не трэба спяшацца. Яшчэ вам не час”.

Культурна. Карэктна. Не ў форме загаду...

І ў сённяшнім часе, як і тады,

Удзячны я партыі і ўраду,

Што працягнулі мае гады.

Няхай гэты час быў далёка не лепшы,

Не ласкавы час, але ўсё ж з ласкі Бога

Дарэшты я ў ім дапісаў мае вершы –

Як змест і як подпіс майго некралога.

Уладзімір Някляеў

Уладзімір Пракопавіч Някляеў нарадзіўся 9 ліпеня 1946 года ў Смаргоні ў сям’і рускага бацькі і беларускай маці. Дзяцінства ён правёў у Крэве — старажытным мястэчку, якое ў інтэрв’ю сайту Charter97.org называў сваёй галоўнай крыніцай натхнення і «асабістым космасам».