Z-блогер заявіў пра катастрофу ў сельскай гаспадарцы РФ

• 1.08.2026, 15:15

Паліва для ўборачнай няма.

Расійскі Z-блогер Іван Атракоўскі паведаміў пра сур'ёзныя праблемы ў аграрным сектары РФ праз недахоп дызельнага паліва. Паводле яго слоў, фермары ў шэрагу рэгіёнаў вымушаныя пазычаць паліва адзін у аднаго, каб завяршыць уборачную кампанію.

На гэта звярнуў увагу украінскі журналіст Дзяніс Казанскі, падкрэсліўшы, якой цаной для РФ абыходзіцца бессэнсоўная і злачынная вайна супраць Украіны.

Атракоўскі спасылаецца на старшыню савета Асацыяцыі сялянскіх гаспадарак і сельскагаспадарчых кааператываў Растоўскай вобласці Аляксея Жданава, які заявіў, што многія гаспадаркі ўжо рыхтуюцца прадаваць пшаніцу па сабекошце, а частцы прадпрыемстваў не стае сродкаў нават на наступную пасяўную.

Паводле слоў блогера, аналагічная сітуацыя назіраецца і ў іншых рэгіёнах Расіі. Ён папярэджвае, што многія малыя і сярэднія сельскагаспадарчыя прадпрыемствы могуць збанкрутаваць, што ў перспектыве прывядзе да скарачэння прапановы прадуктаў, пагаршэння іх якасці і далейшага росту цэн.