Амаль па ўсёй Беларусі ўвялі абмежаванні на наведванне лясоў

• 1.08.2026, 16:30

Збіраць грыбы і ягады пешшу пакуль дазволена.

Бесперашкодна наведваць лясы дазволена толькі ў 5 з 118 раёнаў Беларусі, сведчыць інтэрактыўная карта на сайце Міністэрства лясной гаспадаркі.

Свабодна хадзіць у лясы можна ў Гродзенскім раёне, а таксама ў чатырох раёнах Віцебскай вобласці — Верхнядзвінскім, Мёрскім, Шаркаўшчынскім і Браслаўскім.

У астатніх 113 раёнах дзейнічаюць абмежаванні, якія азначаюць, што ў лясы нельга заязджаць на аўтамабілях і распальваць там вогнішчы, але даступныя пешыя прагулкі, збор ягад і грыбоў.

Паводле звестак Белгідрамета, максімальная тэмпература 1 жніўня ў Беларусі складае ад +26 градусаў на поўначы да +37 на поўдні. Паведамляецца пра кароткачасовыя дажджы, навальніцы; на паўночным захадзе пры навальніцах месцамі магчымыя моцныя зліўні, град.