Беларусак да 40 гадоў накіруюць на новыя медыцынскія абследаванні

• 20.08.2026, 11:15

Яны будуць праходзіць у абавязковым парадку.

У Беларусі пашыраюць праграму дыспансерызацыі для жанчын. Адно з галоўных новаўвядзенняў дазволіць загадзя выяўляць рызыкі бясплоддзя.

Пра гэта БелТА расказаў намеснік дырэктара па навуковай рабоце РНПЦ «Маці і дзіця» Іван Курловіч.

Новаўвядзенне закране беларусак ва ўзросце ад 18 да 39 гадоў. Падчас дыспансерызацыі яны ў абавязковым парадку будуць праходзіць дадатковыя абследаванні.

У праграму будуць уключаныя гарманальны скрынінг і даследаванне яечнікавага рэзерву. Апошняе дазваляе ацаніць запас яйцаклетак у яечніках і рэпрадукцыйны патэнцыял жанчыны.

Такім чынам медыкі змогуць заўважыць магчымыя праблемы яшчэ да з’яўлення клінічных праяў.

Акрамя таго, для маладых жанчын запланаваныя прафілактычныя акцыі. Сярод іх — «Будучая мама» і «Здароўе шчытападобнай залозы».

Што правераць у пацыентак старэйшага ўзросту

Свае абследаванні прадугледжаныя і для жанчын старэйшага ўзросту. Ім будуць праводзіць мэтавыя скрынінгі раку малочнай залозы і астэапарозу.

Усе гэтыя меры ўвайшлі ў вялікі прафілактычны план Мінздароўя, запушчаны ў «год беларускай жанчыны».

Паводле слоў Івана Курловіча, задача такога падыходу — зрабіць медыцыну папераджальнай, каб магчымыя праблемы са здароўем удавалася выяўляць як мага раней.