«Лік ідзе літаральна на гадзіны»

• 11.09.2026, 12:02

У Магілёве разгараецца скандал вакол коняў ЦОР па конным спорце.

У сацсетках распаўсюджваецца інфармацыя пра тое, што двух спартыўных коней — Вавілона і Элегію — адпраўляюць на забой. Першай забіла трывогу мясцовая блогерка. Яна заклікала жыхароў Магілёва і ўсіх неабыякавых максімальна распаўсюджваць інфармацыю.

Паводле яе слоў, коней ужо вязуць на мясакамбінат, аднак ахвотныя гатовыя іх выкупіць і забяспечыць жывёлам далейшы догляд, піша bgmedia.

«Сітуацыя крытычная, лік ідзе літаральна на гадзіны», — гаворыцца ў апублікаваным звароце.

Пры гэтым важна адзначыць: на дадзены момант гэтыя звесткі распаўсюджваюцца карыстальнікамі сацыяльных сетак. Афіцыйнага пацверджання ад Магілёўскага ЦОР або іншай адказнай структуры ў адкрытым доступе няма.

Публікацыя выклікала прыкметны водгук. Карыстальнікі заклікаюць журналістаў звярнуць увагу на сітуацыю, патрабуюць даць магчымасць выкупіць жывёл і задаюць даволі канкрэтныя пытанні кіраўніцтву цэнтра.

«Цяжка паверыць, што ў наш час такое адбываецца. Рэпутацыя — надзвычай далікатная рэч. Не ўяўляю, хто пойдзе займацца ў гэтую школу, калі ў іх будзе такая “слава”», — напісаў адзін з карыстальнікаў.

Іншыя спрабуюць высветліць, як увогуле можна забраць коней. У каментарыях гучаць і гісторыі людзей, якія ўжо сутыкаліся з падобнымі сітуацыямі.

«Мяне так у мінулым не далі выкупіць каня з навучальнай групы, наогул не патлумачыўшы прычын. Было ў іншай дзяржаўнай коннай школе. Чаму — для мяне дагэтуль загадка. У выніку яе здалі на мяса. Было б добра, каб такое спынілася», — падзялілася адна з карыстальніц.

Ёсць і больш асцярожныя каментары. Людзі спрабуюць зразумець, ці сапраўды інфармацыя дакладная і чаму, калі пакупнікі гатовыя забраць жывёл, іх усё роўна адпраўляюць на мясакамбінат.

«Незразумела: ёсць людзі, гатовыя выкупіць, але ўсё роўна вязуць на мясакамбінат. Чым матывуюць? Бо грошы яны атрымаюць хутчэй ад выкупу, чым ад рэалізацыі мяса. Вы ўпэўнены, што валодаеце дакладнай інфармацыяй?» — задаецца пытаннем карыстальніца.

На момант падрыхтоўкі матэрыялу Магілёўскі ЦОР па конным спорце і сучасным пяцібор'і публічна не адрэагіраваў на пытанні карыстальнікаў пра Вавілона і Элегію.

Няма інфармацыі пра гэтую сітуацыю і на афіцыйным сайце ўстановы. І ў іхнім Instagram таксама не ўдалося знайсці адказы на ўзніклыя пытанні.