Расія можа страціць 30% магутнасцяў нафтаперапрацоўкі на паўтара года
- 11.09.2026, 20:27
Справаздача Міжнароднага энергетычнага агенцтва.
Міжнароднае энергетычнае агенцтва знізіла свой базавы прагноз па перапрацоўцы расійскай нафты на наступныя 18 месяцаў прыкладна да 4 млн барэляў у суткі. Гэта на 30% менш, чым да ўварвання ва Украіну ў 2022 годзе.
Аб гэтым гаворыцца ў штомесячнай справаздачы МЭА аб нафтавым рынку, паведамляе Bloomberg.
«Захоўваецца рызыка таго, што нават гэта больш асцярожная ацэнка можа недаацэньваць праблемы, з якімі сутыкаецца расійскі нафтаперапрацоўчы комплекс. Павелічэнне тэрмінаў пастаўкі запасных частак і набліжэнне халадоў могуць узмацніць нагрузку на расійскую сістэму», — адзначае Міжнароднае энергетычнае агенцтва.
Паводле дадзеных МЭА, нафтаперапрацоўчая галіна РФ прыходзіць у заняпад, бо санкцыі не дазваляюць ёй аднавіцца пасля інтэнсіўных і дакладных удараў украінскіх БПЛА.
«На дадзены момант уяўляецца верагодным, што пастаянныя ўдары беспілотнікаў і фрагментарны характар рамонтных работ маюць накапляльны негатыўны эфект і пагаршаюць стан сістэмы нафтаперапрацоўкі», — гаворыцца ў справаздачы.
Паводле падлікаў Bloomberg, у жніўні расійскія НПЗ падвергліся як мінімум 22 ударам. Гэта самы высокі месячны паказчык з пачатку поўнамаштабнай вайны.
«Украінскія сілы прымяняюць некалькі хваляў беспілотнікаў супраць асобных аб'ектаў, перагружаючы сістэмы абароны і сродкі СПА. Дакладнасць траплянняў таксама ўяўляецца вышэйшай», — паведамляе МЭА.
Цяпер дроны паражаюць устаноўкі другаснай перапрацоўкі на расійскіх НПЗ; іх замена, паводле ацэнак Міжнароднага энергетычнага агенцтва, можа заняць каля 6–8 месяцаў.
У той жа час санкцыі супраць энергетычнага сектара РФ абмяжоўваюць доступ да запаснога абсталявання, што яшчэ больш ускладняе правядзенне рамонтных работ.
Акрамя таго, МЭА панізіла свой прагноз паставак расійскай нафты на 2026 год на 125 тыс. барэляў у суткі — да 8,7 млн барэляў у суткі.
10 верасня агенцтва Bloomberg са спасылкай на даныя штомесячнай справаздачы АПЕК паведаміла, што ў жніўні 2026 года РФ здабывала ў сярэднім 8,718 млн барэляў нафты ў суткі. Гэта на 160 тыс. барэляў у суткі менш за перагледжаны сярэдні паказчык за ліпень і найбольшае штомесячнае зніжэнне з таго часу, як здабыча нафты ў Расіі пачала скарачацца ў снежні 2025 года.
3 верасня агенцтва Bloomberg паведаміла, што ў жніўні 2026 года даходы РФ ад продажу нафты ўпалі да мінімальнага ўзроўню за апошнія шэсць месяцаў з-за зніжэння экспартных цэн. Гэтая сітуацыя ўзмацняе ціск на здольнасць Крамля фінансаваць вайну супраць Украіны.