Краіна, амаль у пяць разоў меншая за Беларусь, стала сусветным лідарам па экспарце бульбы

• 12.09.2026, 17:52

Яна паставіла на сусветны рынак карняплоду на $1,3 мільярда.

Мінулым годам Нідэрланды сталі лідарамі па пастаўках у іншыя краіны неапрацаванай бульбы. Пра гэта гаворыцца ў аналізе партала World’s Top Exports, піша «Зеркало».

Прыкметна, што тэрыторыя гэтай краіны амаль у пяць разоў меншая, чым у Беларусі, яна таксама ўступае іншым лідарам рэйтынгу.

На Нідэрланды прыпадае 19,6% экспартных продажаў неапрацаванай бульбы. Мінулым годам краіна паставіла на сусветны рынак карняплоду на 1,3 млрд долараў.

Зусім нязначна саступае Францыя, якая зарабіла на гэтым 1,2 млрд долараў, або 18% усяго рынку.

У пяцёрку самых буйных экспарцёраў уваходзяць Германія з аб’ёмам паставак 746,2 млн долараў, што складае 11% сусветнага экспарту, Егіпет — 524,1 млн (7,7%) і Канада — 381,4 млн (5,6%). У дзясятку лідараў трапілі таксама Кітай, ЗША, Бельгія, Пакістан і Вялікабрытанія.

Для разумення: тэрыторыя Нідэрландаў 41 43 км² — гэта амаль у пяць разоў меней за Беларусь (207 тыс. квадратных кіламетраў). Калі разглядаць менавіта сельскагаспадарчыя землі, то іх там, паводле дадзеных Сусветнага банка, 18 30 км², а ў Беларусі — 80 40 км².

На рынку гатовай, кансерваванай і замарожанай бульбы найбуйнейшым экспарцёрам застаецца Бельгія: аб’ём яе паставак складае 4,5 млрд долараў, або 25,5% сусветнага экспарту. У пяцёрку лідараў таксама ўваходзяць Нідэрланды, Канада, ЗША і Францыя.

У топ-15 у гэтай групе ёсць два нашыя суседзі — Польшча і Расія. Першая апынулася на 7-м месцы, зарабіўшы на апрацаванай бульбе 564,4 млн долараў, другая — на 14-м (139,4 млн).

Праўда, Беларусь таксама была лідаркай, але ў значна больш сціплых маштабах і рэгіёне. У 2024 годзе яна была найбуйнейшай пастаўшчыцай карняплоду ў Расію, адправіўшы туды рэкордныя 193,8 тысячы тон.

А ў 2025-м беларусы самі сутыкнуліся з дэфіцытам бульбы.