«Лукашэнка тым жа голасам падтаквае Крамлю»
- 13.09.2026, 5:30
Калі ўсе зразумеюць — будзе ўжо позна.
Расійскі дыктатар Уладзімір Пуцін вядзе гібрыдную вайну супраць Еўропы, прыкладам такой вайны стала анексія Крыму, заявіў Павел Лакічук, кіраўнік праграм па бяспецы Цэнтра глябалістыкі «Стратэгія XXI», у эфіры Radio NV.
«Была заява Пуціна, што Расіі няма чаго дзяліць з Еўропай, усё падзялілі па выніках Другой сусветнай вайны. А я нагадаю: па выніках Другой сусветнай вайны зона ўплыву і кантролю Савецкага Саюза цягнулася да Усходняй Германіі. Вось тонкі намёк на тое, што справа не ва Украіне», – сказаў ён.
На думку эксперта, расійскі дыктатар вядзе гібрыдную вайну супраць Еўропы.
«Сутнасць гібрыднай вайны не ў тым, як яе разумеюць еўрапейцы. Еўрапейцы дагэтуль лічаць гібрыднай вайной сітуацыю, калі прадпрымаюцца нейкія дапарогавыя дзеянні – гэта яшчэ не вайна, гэта гібрыдная вайна, а вось як толькі пачнецца сапраўдная вайна, тады і пачнецца. Але, паводле слоў Герасімава, сутнасць гібрыднай вайны ў тым, што праціўнік не павінен усвядоміць, што супраць яго вядуць вайну, да таго моманту, калі яму ўжо пара капітуляваць, калі ён вайну прайграў», – патлумачыў Лакічук.
Ён падкрэсліў, што выпадак з Крымам быў прыкладам менавіта такой гібрыднай вайны.
«Зялёныя чалавечкі ўваходзяць у Крым, захопліваюць украінскія аб'екты, Кіеў і Еўропа глядзяць са здзіўленнем і не разумеюць, што адбываецца. Пасяджэнне РНБО, кажуць: «Не, не, толькі не трэба выводзіць танкі, бо гэта будзе вайна». Нашы еўрапейскія партнёры кажуць: «Пачакайце, нічога не рабіце, зараз усё праясніцца, калі ўсё праясніцца, мы ўсё вырашым». А потым Пуцін праводзіць псеўдарэферэндум, уключае Крым у склад Расійскай Федэрацыі і кажа: «Не, гэта былі не зялёныя чалавечкі, гэта нашы вайскоўцы, а Крым цяпер тэрыторыя Расіі». Усё, вайна скончылася. Вось калі яна скончылася, усе ўсвядомілі, што гэта была вайна», – патлумачыў эксперт.
Ён працягнуў, што менавіта такая цяпер стратэгія Пуціна ў дачыненні да Еўропы, і ў дачыненні да Украіны таксама:
«Пуцін разглядае Украіну як плацдарм для наступу на Еўропу. Але пры гэтым ён кажа: «Не, не, не хвалюйцеся». І Лукашэнка тым жа голасам заяўляе, што Беларусь нікому з сваіх еўрапейскіх суседзяў не пагражае. Ні Літве, ні Эстоніі, ні Польшчы не варта непакоіцца. Украіны ў гэтым спісе няма».