The Guardian: За фасадам выбараў у Расіі хаваецца страх Крамля

• 14.09.2026, 10:35

Занадта відавочная фальсіфікацыя можа сыграць супраць уладаў РФ.

Выбары ў Дзярждуму не пагражаюць уладзе Уладзіміра Пуціна, аднак сама неабходнасць старанна кантраляваць іх вынік паказвае растучую трывогу Крамля з-за настрояў у расійскім грамадстве. Да такой высновы прыходзіць The Guardian (пераклад — сайт Charter97.org).

Расійская сістэма даўно ператварыла выбары ў інструмент кіраванай дэмакратыі, дзе перамога «Адзінай Расіі» фактычна прадвызначаная. Аднак занадта відавочная фальсіфікацыя можа сыграць супраць Крамля. Калі афіцыйны вынік будзе моцна разыходзіцца з рэальнымі настроямі людзей, гэта толькі падкрэсліць страх улады перад свабодным волевыяўленнем.

Адным з такіх сігналаў стала рашэнне Вярхоўнага суда не дапусціць да выбараў ліберальную партыю «Яблоко». Фармальная падстава для гэтага выглядала настолькі сумніўнай, што рашэнне выклікала пытанні нават з улікам цяперашніх расійскіх рэалій.

Асаблівае значэнне мае пазіцыя партыі адносна вайны. Цяперашнія выбары стануць першымі парламенцкімі пасля паўнамаштабнага ўварвання ва Украіну ў 2022 годзе. У сваёй праграме «Яблоко» заклікае да спынення агню, дыпламатыі і міру.

«Рашэнне не дапусціць нават гэтае пасланне да выбаршчыкаў указвае на нервовасць вакол папулярнасці вайны», — піша The Guardian.

Па-за межамі афіцыйнай прапаганды расіяне ўсё часцей сутыкаюцца з наступствамі вайны. Украінскія ўдары па аб’ектах у глыбіні Расіі ўскладняюць спробы Масквы падаваць канфлікт як далёкую ад звычайных грамадзян вайну. Інфляцыю, недахоп паліва і страты на фронце ўсё цяжэй хаваць.

Паводле ацэнак, расійскія страты дасягнулі прыблізна 1,5 млн чалавек, уключаючы сотні тысяч загінулых. На фоне недахопу добраахвотнікаў улады звяртаюцца да ціску і падману пры вербаванні ў армію. Адначасова распаўсюджваюцца чуткі пра новую мабілізацыю пасля выбараў.

«Чым больш рупліва Крэмль імітуе доказы народнай падтрымкі, тым менш пераканаўча гэта выглядае», — адзначае выданне.