У Беларусь масава заляцелі расійскія ўдарныя беспілотнікі

• 14.09.2026, 11:48

За суткі мяжу парушылі як мінімум 10 беспілотнікаў.

Упершыню за год зафіксаваныя масавыя залёты расійскіх ударных беспілотнікаў у Гомельскую вобласць на працягу сутак. Такога не было роўна год — цягам апошніх месяцаў фіксаваліся толькі адзінкавыя выпадкі. Апошні раз масавыя адначасовыя залёты былі на пачатку верасня 2025 года, піша «Флагшток».

І вось 12—13 верасня, паводле падлікаў «Флагштока» і ўдакладненых звестак, як мінімум 10 расійскіх беспілотнікаў парушылі паветраную прастору Беларусі.

Падчас масіраванай атакі Расіі ў суботу каля 11:00 пачаліся першыя ўварванні беспілотнікаў у Беларусь. У гэты час адзін з іх ужо вылятаў ва Украіну, а праз гадзіну два беспілотнікі заляцелі на Гомельшчыну і накіроўваліся ў бок Нараўлі і Лельчыц. Затым яшчэ два рухаліся ў накірунку Мазыра. Каля 14:00 на Гомельшчыну заляцела новая пара расійскіх дронаў. Праз паўгадзіны — яшчэ адзін беспілотнік.

Прыблізна а 02:30 13 верасня быў зафіксаваны вылет з Беларусі аднаго беспілотніка, каля 10:40 — яшчэ аднаго.

Большасць дронаў вылецела назад ва Украіну, але дакладнай інфармацыі пра ўсе беспілотнікі, што ўварваліся ў Беларусь, пакуль няма.

Паводле інфармацыі ўкраінскага маніторынгавага канала eRadar, як правіла, гэта былі не рэактыўныя, а класічныя «Герані» з рухавіком, гук якога нагадвае гук мапеда.

Часцей за ўсё дроны парушалі паўднёвую мяжу Гомельскай вобласці і рухаліся ў накірунку Мазыра, Нараўлі і Лельчыц.

Паводле звестак канала eRadar, два дроны каля 13:45 былі зафіксаваныя ў Мазырскім раёне на адлегласці 20 кіламетраў ад беларуска-ўкраінскай мяжы.

Акрамя таго, адзін з жыхароў Петрыкаўскага раёна паведамляў, што прыкладна з 10:00 да 12:00 чуў у небе характэрны гук «Шахедаў», а таксама — рэактыўнага рухавіка. Магчыма, дроны пераследавалі знішчальнікі.

Залёты беспілотнікаў былі звязаныя з масіраванай атакай Расіі на заходнія вобласці Украіны ва ўмовах туманнага надвор'я.