«МЛ Віцебск» развітаўся з трэцім трэнерам за сезон

• 14.09.2026, 14:55

У адстаўку падаў расійскі спецыяліст Філіп Сакалінскі.

Дзейны чэмпіён Беларусі «МЛ Віцебск» ажыццявіў ужо трэцюю трэнерскую адстаўку ў бягучым сезоне.

«Букмэкеры» ўвайшлі ў сезон пад кіраўніцтвам Міхаіла Марціновіча, які развітаўся з клубам 27 красавіка. Магамед Адзіеў, які змяніў беларуса, быў звольнены 25 чэрвеня. І сёння, 14 верасня, «МЛ» абвясціў пра адстаўку Філіпа Сакалінскага, які, аднак, працягне працу ў клубе.

На дадзены момант пераемнік Сакалінскага не названы, але з нядаўняга часу ў трэнерскім штабе клуба працуе галоўны трэнер беларускай «маладзёжкі» Віталь Паўлаў.