Лукашэнка падставіў Пуціну паліўнае плячо

• 18.09.2026, 17:51

Пасля ўдараў па НПЗ Масква ў 23 разы павялічыла закупкі беларускага бензіну.

Расія закупае беспрэцэдэнтныя аб’ёмы паліва ў Беларусі, каб справіцца з бензінавым крызісам, які ахапіў рэгіёны і буйныя гарады пасля ўкраінскіх удараў па НПЗ, паведамляе The Moscow Times.

Як паведамляе Reuters, за студзень–жнівень на расійскі рынак паступіла 866 тысяч тон бензіну з двух беларускіх НПЗ — у 23 разы больш, чым за той жа перыяд годам раней. Пастаўкі дызпаліва выраслі ў 5,4 раза і дасягнулі 570 тысяч тон, паведамілі крыніцы агенцтва.

Рэкордным па імпарце з Беларусі стаў ліпень, калі з‑за налётаў беспілотнікаў выпуск паліва спынялі 8 расійскіх НПЗ, а аб’ёмы нафтаперапрацоўкі ўпалі ніжэй за 4 млн барэляў у суткі ўпершыню больш як за 20 гадоў. У ліпені Расія закупіла 212 тысяч тон беларускага бензіну, 162 тысячы тон дызелю і 13,1 тысячы тон авіякерасіну. У жніўні пастаўкі нязначна знізіліся: 201 тысяча тон бензіну, 153 тысячы тон дызпаліва і 9,6 тысячы тон авіяпаліва, сказалі крыніцы Reuters.

Беларусь мае два НПЗ з сумарнай намінальнай магутнасцю перапрацоўкі 24 мільёны тон у год. Раней Мінск заяўляў пра гатоўнасць часткова кампенсаваць магутнасці расійскіх НПЗ, што выпадаюць з‑за атак беспілотнікаў.