Нетаньяху таемна наведаў ААЭ

• 29.09.2026, 8:48

Ён сустрэўся з прэзідэнтам краіны.

Прэм'ер-міністр Ізраіля Біньямін Нетаньяху здзейсніў неабвешчаны візіт у Аб'яднаныя Арабскія Эміраты і сустрэўся з прэзідэнтам краіны Мухамедам бен Заідам Аль Нахаянам. Паводле звестак СМІ, ён хацеў дамагчыся абвяржэння інфармацыі пра тое, што ААЭ папярэджвалі яго пра падрыхтоўку нападу ХАМАС, паведамляе BBC.

Візіт адбыўся ў нядзелю. ААЭ пацвердзілі, што Нетаньяху быў у краіне і сустрэўся з прэзідэнтам.

Паводле інфармацыі ананімных крыніц некалькіх СМІ, ізраільскі прэм'ер хацеў асабіста папрасіць бен Заіда абвергнуць паведамленні пра папярэджанне адносна падрыхтоўкі ХАМАС да нападу 7 кастрычніка 2023 года.

Канцылярыя Нетаньяху з самага пачатку катэгарычна адмаўляе, што прэм'ер атрымліваў ад ААЭ або па іншых каналах папярэджанне пра падрыхтоўку нападу.

Спрэчка датычыцца падзей напярэдадні 7 кастрычніка 2023 года, калі ХАМАС здзейсніў маштабны напад на Ізраіль. Пытанне пра тое, якой інфармацыяй валодала ізраільскае кіраўніцтва перад атакай, застаецца прадметам палітычных дыскусій у краіне.