У Бранскай вобласці затрымалі фуру з мясам з Беларусі

• 29.09.2026, 10:11

У Бранскай вобласці затрымалі фуру з мясам з Беларусі

Груз мусіў трапіць у Узбекістан, але яго вярнулі назад.

У Бранскай вобласці затрымалі аўтамабіль, які перавозіў вялікую партыю мяса з Беларусі. Груз скіроўваўся транзітам праз тэрыторыю Расіі ў Узбекістан, але да месца прызначэння так і не дабраўся.

Падрабязнасці здарэння паведамілі ў Расельгаснаглядзе.

Аўтамабіль спынілі ў ноч з 15 на 16 верасня. У ім было каля 19 т астуджанай ялавічыны, раздзеленай на чвэрці. Паводле дакументаў, прадукцыю вырабіла ТАА «Аляксандраў» з Мінскай вобласці, а атрымаць яе павінна была ўзбекская кампанія ТАА «MEAT MAGNAT».

Аднак падчас агляду ў спецыялістаў узніклі пытанні да мяса. Высветлілася, што на тушах не было ветэрынарных кляймаў. Без такой маркіроўкі немагчыма вызначыць прыналежнасць прадукцыі і пацвердзіць яе ветэрынарны статус.

У выніку далейшы рух партыі спынілі. Пра парушэнне паведамілі ветэрынарным службам Беларусі, а ўвесь груз вярнулі назад.