Лукашэнка: Мы не хочам паўтарыць лёс Украіны
- 29.09.2026, 18:36
Дыктатар баіцца ўварвання Расіі ў Беларусь.
Дыктатар Аляксандр Лукашэнка заявіў на сустрэчы з губернатарам Ульянаўскай вобласці Аляксеем Русскіх, што яго непакояць заклікі расійскіх блогераў акупаваць нашу краіну.
«Я вельмі ўважліва адсочваю сродкі масавай інфармацыі, бо сёння вайна перадусім ідзе ў СМІ. І шчыра вам скажу, што часам са здзіўленнем чытаю, што там некаторыя ці то блогеры, ці то яшчэ хтосьці папісваюць у дачыненні да Беларусі. Пра шматвектарнасць і гэтак далей. Колькі разоў ужо казаў пра гэта, што шматвектарнасць ніяк не аддаляе нас ад Расійскай Федэрацыі. Так, мы праводзім шматвектарную палітыку, таму што эканоміка ляжыць у аснове», — заявіў Лукашэнка.
Па яго словах, Захад спыніў супрацоўніцтва з ім. Таму ў межах шматвектарнасці ён пайшоў на Поўдзень, Паўднёвы Захад і Усход, развівае адносіны з Афрыкай.
«Наш інтарэс і вектары там, дзе наша эканоміка. Тут не ідзе гаворка пра нашы глыбінныя адносіны, найперш з вамі, Расійскай Федэрацыяй. Таму балбатня пра гэтую шматвектарнасць і папрокі ў адрас Лукашэнкі абсалютна неабгрунтаваныя, — сказаў узурпатар. — Не для мяне ўжо змяняць нейкія вектары. Некаторыя ўжо нават дайшлі да таго, што «Лукашэнка — гэта не саюзнік». Ну, гэта справа густу. Пакуль мы (і, думаю, так будзе і далей) знаходзім агульную мову з кіраўніцтвам Расійскай Федэрацыі. І з прэзідэнтам Расіі, і з кіраўнікамі вядучых партый. Ніякіх разыходжанняў у падыходах.
Мы — патрыёты, мы гатовыя абараняць сваю Айчыну. І вы павінны ведаць, што адыходу тут ніякага, а тым больш здрады, няма і быць не павінна. Чым заканчваецца здрада, вы бачыце ва Украіне. Мы не хочам паўтарыць гэты лёс», — сказаў Лукашэнка.
Таксама ён адзначыў, што ў Беларусі імкнуцца развіваць увесь той вытворчы патэнцыял, які застаўся з часоў Савецкага Саюза.
«Мы нічога не страцілі з савецкіх часоў, нічога не закрылі, не прыкрылі, наадварот — развівалі. І паколькі мы, як казаў класік, стаялі на плячах гігантаў, гэта спрыяла захаванню таго, што мы сёння маем. Гэта важна для любой дзяржавы, — сказаў дыктатар. — І тут для нас вельмі паказальны Кітай. Мы сябруем з Сі Цзіньпінам, часта з ім абмяркоўваем гэтую тэму. І ён мне пра гэта часта кажа, што нічога (у Кітаі) не адмаўлялі: ні перыяду Мао Цзэдуна, ні Дэна Сяопіна, нікога. Яны бралі ўсё найлепшае. Дык паглядзіце на вынік развіцця КНР. Гэта — вядучая эканоміка свету, вядучая краіна, з якой усе вымушаныя лічыцца. Любіш ты Кітай ці не любіш, як амерыканцы, але лічыцца даводзіцца».