У Беларусі знік яшчэ адзін населены пункт

• 29.09.2026, 22:02

Ужо 19-ы з пачатку года.

З карты краіны знікла вёска Пірэвічы Дабрагошчанскага сельсавета Гомельскай вобласці. Адпаведнае рашэнне прыняў Жлобінскі райсавет дэпутатаў.

Вёска Пірэвічы была заснаваная ў пачатку 1920-х гадоў перасяленцамі з суседніх вёсак на былых памешчыцкіх землях. У 1932 годзе жыхары ўступілі ў калгас. Падчас Вялікай Айчыннай вайны 21 мясцовы жыхар загінуў на фронце. У 2004 годзе ў Пірэвічах налічвалася 1 гаспадарка і 2 жыхары, піша «СБ. Беларусь сёння».

Як падлічыла выданне Blizko.by, з пачатку года ў Беларусі зніклі ўжо 19 населеных пунктаў.

Нагадаем, 7 студзеня 2024 года Аляксандр Лукашэнка заявіў, што «зробіць усё для захавання вёскі».

Паводле яго меркавання, у дзяржаў, якія разбурылі вёску, няма будучыні.

«Страцім вёску — страцім дзяржаву. Яе проста не будзе. Таму я вам абяцаю, што як чалавек, які вырас у вёсцы, ведаючы жыццё сельскага чалавека, складанасці і цяжкасці, я зраблю ўсё, каб захаваць нашу вёску. Каб вёска — яна сёння ёсць карміцелька нашых людзей, фундамент нашай дзяржавы, — была моцная, магутная і квітнеючая», — заявіў Аляксандр Лукашэнка.