У Італіі зрабілі важную заяву аб замарожаных расійскіх актывах

• 3.09.2026, 8:13

Супраць Масквы трэба дзейнічаць загадзя.

Італія не выступае супраць выкарыстання замарожаных расійскіх актываў для падтрымкі Украіны. Пра гэта заявіў міністр замежных спраў краіны Антоніа Таяні агенцтву Ansa.

«У прынцыпе, мы не супраць, але трэба высветліць, ці ёсць для гэтага прававыя падставы… Праблема заўсёды заключалася ў тым, што прыняцце падобных мер можа пацягнуць за сабой юрыдычныя праблемы. Мы шмат разоў абмяркоўвалі гэта як у межах Еўрасаюза, так і на іншых міжнародных пляцоўках, і ніводнага рашэння не было прынята менавіта з гэтай прычыны — не з палітычных, а з юрыдычных меркаванняў», — заявіў ён.

Таяні таксама папярэдзіў, што Расія можа паспрабаваць паўплываць на агульнанацыянальныя выбары ў Італіі ў наступным годзе, а таксама на выбары ў іншых краінах, такіх як Францыя, Польшча і Іспанія.

«Я перакананы, што гэта можа адбыцца, таму нам трэба дзейнічаць загадзя», — сказаў міністр.

Ён дадаў, што Італія ўжо адсочвае кіберагрозы і іншыя магчымыя формы расійскага ўмяшання.