АДКБ правядзе ў Беларусі вучэнні

• 3.09.2026, 12:12

Асноўнай пляцоўкай стане палігон Лосвідо ў Віцебскай вобласці.

З 11 па 16 кастрычніка на тэрыторыі Беларусі адбудуцца вучэнні Арганізацыі Дагавора аб калектыўнай бяспецы «Нерушнае братэрства — 2026». Пра гэта паведаміў начальнік Аб’яднанага штаба АДКБ Андрэй Сярдзюкоў.

Асноўнай пляцоўкай стане палігон Лосвідо ў Віцебскай вобласці — менавіта там пройдзе падрыхтоўка міратворчых сіл арганізацыі. Да вучэнняў таксама прыцягнуць авіяцыю, інжынерныя падраздзяленні, разлікі беспілотнікаў, медыцынскіх спецыялістаў, ратавальнікаў МНС, унутраныя войскі і АМАП МУС Беларусі.

Паралельна на Стародарожскім палігоне адбудуцца іншыя вучэнні АДКБ — «Бар’ер-2026». У іх межах сумеснае фарміраванне радыяцыйнай, хімічнай і біялагічнай абароны разам з медыцынскім забеспячэннем адпрацуе дзеянні ва ўмовах біялагічных пагроз.

Акрамя таго, удзельнікі вучэнняў адпрацуюць навыкі ліквідацыі наступстваў маштабнага і імклівага распаўсюджвання небяспечных інфекцыйных захворванняў, а таксама задачы калектыўнага рэагавання на падобныя пагрозы.