Польскія знішчальнікі перахапілі разведвальны самалёт РФ

• 3.09.2026, 16:45

Гэта ўжо другі падобны выпадак за тыдзень.

Міністр абароны Польшчы Уладзіслаў Касіняк-Камыш паведаміў пра чарговы інцыдэнт над Балтыйскім морам з удзелам расійскага разведвальнага самалёта.

Пра гэта міністр напісаў у сацыяльнай сетцы X.

Касіняк-Камыш падкрэсліў, што польская паветраная прастора парушаная не была, аднак расійскі самалёт ствараў пагрозу для грамадзянскай авіяцыі.

«Чарговы інцыдэнт над Балтыйскім морам з удзелам расійскага разведвальнага самалёта Іл-20. У 40 км на поўнач ад Усткі нашы знішчальнікі перахапілі расійскі самалёт, у якога не былі ўключаныя ідэнтыфікацыйныя прылады і які ствараў пагрозу для грамадзянскай авіяцыі. Парушэння польскай паветранай прасторы не адбылося», — напісаў польскі міністр.

Гэта ўжо другі падобны выпадак за тыдзень. Раней, у панядзелак, 31 жніўня, польскія знішчальнікі перахапілі расійскі разведвальны самалёт Іл-20 у 30 км на поўнач ад горада Леба.