Лукашэнка баіцца прарыву мяжы на пазадарожніках

• 3.09.2026, 17:15

На вучэннях адпрацоўваюць сцэнар, які стаў мемам сярод беларусаў.

МУС Беларусі праводзіць маштабную праверку баявой гатоўнасці сілавікоў на Віцебшчыне. Па выніках «маштабнай праверкі» будзе дадзена ацэнка гатоўнасці сілавікоў «да дзеянняў у асаблівых умовах», яе мэта — «выяўленне праблемных зон», заявіў міністр унутраных спраў Іван Кубракоў.

Як паведамілі ў прэс-службе ведамства, намеснік міністра — камандуючы УВ МУС Мікалай Карпянкоў распавёў, што ў межах праверкі «адпрацоўваецца шэраг уводных на тэрыторыі Віцебшчыны».

Адзін са сцэнарыяў выглядае так: у Лёзне і Дуброўне «разыскваюць невядомых з заплечнікамі, якія пакінулі прадметы на коліях». Да іх пошуку прыцягнутыя групы спецыяльнага прызначэння УВ МУС «Віцязь» і «Рысь». Асноўныя намаганні сканцэнтраваныя на «абследаванні чыгуначнага палатна і прылеглай тэрыторыі з дапамогай БПЛА, пешых і мабільных нарадаў».

Яшчэ адна ўводная «ўтрымлівае інфармацыю пра зламыснікаў, якія перасоўваюцца на двух аўтамабілях павышанай праходнасці без распазнавальных знакаў». Паводле сцэнара, «ёсць звесткі, што яны маюць намер здзейсніць прарыў дзяржаўнай мяжы».

Нагадаем, у 2021 годзе па БТ паказалі фільм, дзе сцвярджалася, што падтрымліваная краінамі НАТА беларуская апазіцыя нібыта распрацавала маштабны план вайсковага перавароту. Адзін з цэнтральных і самых абмяркоўваных элементаў гэтага сцэнару — аповед пра план прарыву мяжы з боку Літвы сіламі «150 пазадарожнікаў (джыпаў)», аснашчаных буйнакалібернымі кулямётамі. Фраза пра джыпы імгненна ператварылася ў папулярны мем у сацсетках і незалежных СМІ.