На рынку імпартнага алькаголю Беларусі адбываюцца змены
- 3.09.2026, 19:43
Сусветныя брэнды алькаголю пакідаюць нашу краіну.
Вытворцы вядомых марак джыну і віскі скасавалі шматгадовыя кантракты з беларускімі прадстаўнікамі.
На рынку імпартнага алькаголю Беларусі адбываюцца змены. Яны датычаць пагадненняў з вядомымі брэндамі, заўважыў Office Life.
Інфармацыя пра гэта ёсць у афіцыйным бюлетэні Нацыянальнага цэнтра інтэлектуальнай уласнасці Беларусі.
Шэраг вядомых марак алькаголю ўваходзіць у адзіны гіганцкі холдынг з Францыі — Pernod Ricard. І з 1998 года кампанія мае беларускую «дачку» — «Перно Рыкар Мінск».
Менавіта праз гэтую фірму кампаніі-вытворцы алькаголю прэзентуюць і абараняюць свае маркі ў Беларусі. Аднак цяпер становішча крыху змянілася.
Так, кампанія-вытворца віскі Chivas, а таксама кампанія-вытворца джыну Beefeater скасавалі ліцэнзійныя дамовы з «Перно Рыкар Мінск».
Гэтыя кампаніі і маркі алькаголю, якія яны выпускаюць, належаць Pernod Ricard.
Пагадненне паміж беларускай кампаніяй і брытанскай фірмай «Эллайд Домек Спірытс энд Уайн Лімітэд» было заключана яшчэ ў 2008 годзе. Кампанія займаецца вытворчасцю джыну Beefeater.
Акрамя таго, у Беларусі яна валодае трыма таварнымі знакамі — два з лагатыпам і слоганам віскі Ballantine’s і адзін з фірмовай этыкеткай джыну Beefeater.
Таксама дамову скасавала «Чывас Брэзерс Лімітэд» са Шатландыі. Гэта кампанія займаецца вытворчасцю вядомага віскі Chivas і свой ліцэнзійны дагавор з мінскім «Перно Рыкар» таксама падпісала ў 2008 годзе.
Згодна з дакументамі, абедзве фірмы скасавалі пагадненні ў ліпені 2026 года. З чым звязана гэтае рашэнне і як яно адаб'ецца на наяўнасці алькаголю гэтых марак на беларускіх прылаўках, пакуль сказаць нельга.
Тым больш «Перно Рыкар Мінск» нядаўна заключала пагадненні са знакавымі брэндамі. Так, шведская The Absolut Group (вытворца аднайменнай гарэлкі) падоўжыла дамову да 2026 года.
А мексіканская «дачка» французскага холдынгу падпісала з ёй ліцэнзійнае пагадненне на выкарыстанне таварнага знака Olmeca. Пад ім холдынг вырабляе тэкілу.