Данеслі асабіста да Пуціна: Буданаў раскрыў таемныя падрабязнасці зрыву рэжыму цішыні

• 5.09.2026, 14:09

Украіна прапаноўвала РФ спыненне агню, але адказу не было.

Кіраўнік офіса прэзідэнта Украіны Кірыл Буданаў паведаміў, што Украіна прапаноўвала Расіі рэжым спынення агню на час візіту амерыканскай дэлегацыі ў Маскву і Кіеў, аднак адказу не было. Пра гэта ён расказаў у каментарыі «Суспільнаму» у суботу, 5 верасня.

Паводле слоў Буданава, прапанову «данеслі асабіста да дыктатара Уладзіміра Пуціна». Яна датычылася часовага спынення паветраных удараў і баявых дзеянняў на фронце.

«Але дроны ляцяць, вы ўсё бачылі», — сказаў Буданаў.

Кіраўнік офіса прэзідэнта Украіны дапусціў, што Расія не будзе наносіць удары па Кіеву падчас візіту спецпрадстаўнікоў прэзідэнта ЗША Стыва Уіткофа і Джарэда Кушнера, які чакаецца 6 верасня.

У суботу Расія працягнула абстрэлы Украіны. У выніку атак пацверджаная гібель пяці чалавек у Камянскім Днепрапятроўскай вобласці. У Мікалаеве з-за ўдару па гандлёвым цэнтры «Эпіцэнтр» пацярпелі два чалавекі. Таксама ўначы былі зафіксаваныя пападанні БПЛА ў Кіеўскай, Палтаўскай, Адэскай і іншых абласцях Украіны.

4 верасня прэзідэнт Украіны Уладзімір Зяленскі пацвердзіў, што спецпрадстаўнікі прэзідэнта ЗША Стыў Уіткоф і Джарэд Кушнер наведаюць Украіну 6 верасня — пасля візіту ў Расію 5 верасня. Украіна прыпыніла ўдары вялікай далёкасці па РФ на гэты перыяд, каб забяспечыць «нармальнае функцыянаванне расійскай паветранай прасторы», — казаў Зяленскі.

У ноч на 5 верасня Сілы абароны Украіны атрымалі загад часова выконваць рэжым цішыні ўздоўж лініі баявога сутыкнення ў перыяд з 00:00 5 верасня да 23:59 8 верасня. Ідзе гаворка пра ініцыятыву ўкраінскага боку.