РФ дронамі атакавала цягнік, які накіроўваўся ў Херсон
- 5.09.2026, 18:45
Ёсць пацярпелая.
Расійскія войскі апоўдні 5 верасня атакавалі некалькімі ўдарнымі беспілотнікамі пасажырскі цягнік, што накіроўваўся ў Херсон.
Пра гэта паведамляе кіраўнік Херсонскай абласной ваеннай адміністрацыі Аляксандр Пракудзін у Telegram.
Паводле яго слоў, для ўдару расіяне выкарысталі беспілотнікі тыпу «Шахед». Дроны атакавалі цягнік, калі той рухаўся ў напрамку Херсона.
Вядома пра адну пацярпелую — 55-гадовую работніцу чыгункі шпіталізавалі ў стане сярэдняй ступені цяжкасці.
Жанчына атрымала асколачнае раненне рукі, кантузію, выбуховую і закрытую чэрапна-мазгавую траўму. Зараз медыкі аказваюць ёй неабходную дапамогу.
У выніку атакі таксама пашкоджаныя два цеплавозы. Іншыя падрабязнасці адносна наступстваў удару ўдакладняюцца.